اول مرة قابلتك فيها

اول مرة عرفت فيها بسمة وإيمان كنا في سنة اولى كان عندنا ندوة لشخصية سياسية في الكلية ولظروف ما الندوة اتلغت وفي نفس الوقت كان في وفد امريكي في كلية تجارة في الجامعة وسكرتيرة العميد طلبت من بوسي انها تجيب شوية طلبة مثقفين وجايبن مجاميع عالية في الثانوية العامة من القسم بتاعنا المبجل فكنت انا واقفة قدام القاعة الي مفروض كانت هتنعقد فيها الندوة فجت بوسي سألتني شوية اسئلة كدة قال اية بتشوفني مثقفة ولا لاء
المهم روحنا للسكرتيرة و واخدت اسامينا  وقالتنا يلا روحوا عشان تقابلوا الوفد الامريكي بس ياريت تيجيبوا ولدين ولا حاجة من الدفعة عندكم واحنا مكناش عارفين حد فقولنا اي حد نقابلة من الولاد الي معانا نخلية يروح يسجل اسمة في مكتب العميد.
ملحوظة واحد من الولدين كان "محمد الملاح" اللي بقى أخويا التاني وصديقي العزيز

وروحنا طبعا كنا متصورين زي ما فهمونا ان احنا هنقابل طلبة زينا وهتتعمل بنا مسابقة وهتتوزع في نهاية المسابقة شهادات تقدير وهنتصور معاهم وكنا كلنا رايحين فرحانين
ولكن المفاجاة الكبرى نروح لا نلاقي طلبة ولا يحزنون كانت ندوة بيشرحوا فيها ازاي نكمل دراسة بره طيب احنا في سنة اولي جايبنا هنا لية ده السؤال الي راح سأله "محمد "للدكتور المشرف على الندوة .اتاريهم جايبنا تكملة عدد عشان القاعة متبقاش فاضية
شوفتوا اليوم الي قابلت فية بوسي وموني بعدها كنا بنكلم بعض عادي وفجاءة بقوا من اعز اصدقائي

انا بحب قاعة المؤتمرات في الكلية الي عرفتني عليكوا بحب كلية تجارة وبحب كلية اداب عشان شوفتكم فيها 
*****************************

اما عايده "ايدي"  فعرفتها يوم نتيجة الترم الاول كانت النتيجة حلوة اوي وكان في زغاريد في المدرج كنا جايبن تقديرات عالية فكنت واقفة وجت سألتني عملت ايه في النتيجة يعني من باب الزمالة وبعدها اتصاحبنا وبقت برضه اعز اصحابي برضه معرفش ازاي واشتغلنا مع بعض شغل جامد في الجريدة كان رئيس التحرير بيقول علينا التوام الجميل

*******************************

اما انوسة وسمرعامر فعرفتهم عن طريق بوسي وموني بقوا برضه من اعز اصحابنا وعلى فكرة هما مش ديما بيزعلوا من بعض انا بس بمنع عنهم الحسد

******************************

اما "بوبة" هبه حسانين حبيبة قلبي وبنتي الصغننه :* فعرفتها اول يوم في الكلية كانت واقفة على السلم لوحدها وواتكلمت معايا واتصاحبنا بعدها وكانت بتيجي عندنا البيت بالرغم انها من محافظة بعيدة عن محافظتي وعن المحافظة الي فيها الكلية .
كانت بتيجي تقضي معانا اليوم وتمشي بعدها بس هي دلوقتي مش بتيجي الكلية واخدة اجازة مفتوحة مقضياها نوم :)))

*****************************

سمر أحمد 

برضه عرفتها عن طريق بوبة عشان كانو مع بعض في المدينة الجامعية وسمورة صاحبة جميلة كنت اما اكلمها في التليفون وماماتها ترد عاليا تقولي سمر بتحبك اوي واحنا كلنا بنحبك كنت بقى مش عارفة أرد م الاحراج اللي فيه

بس مهما كانت بتحبني متقدرش تتحداني في حبي ليها

اصل انا لما بحب بحب بضمير اوي بحب بكل ما فيا
بالمناسبة انا وسمر مشتركين في نفس إسم الأب والأم حتى اللي يشوفنا يقول علينا إخوات

************************

بحبكوا كلكم على بعضكم يا أعز اصحاب وأرق وأجمل أصحاب ربنا يخليكوا ليا وميحرمنيش منكم ابدا ابدا